ROXAS CITY -Hugot nga ginapatuman sang mga barangay officials ang border security checkpoint sang barangay Dayao Roxas City kasunod sang pagpositibo sang 47-anyos nga OFW repatriates nga residente sang nasambit nga barangay.
Suno sa interview sang Bombo Radyo sa kay Punong Barangay Emily Ariza ginpahayag sini nga hugot nga ginabantayan sang mga barangay officials kaupod sang mga kapulisan ang border sang Barangay Dayao kalakip ang subdivision nga ginapaulian sang nagpositibo nga repatriates.
Ginpahayag ni Ariza nga mas ginpasangkad pa sa karun ang pagbantay kumpara sang tinalikdan nga mga binulan.
Gin-athag ni Ariza nga wala sang may mga ginapangita nga dokumento ang mga nagabantay sa border check point apang hugot nga ginpamangkot ang kadto sa nasambit nga barangay.
Ginpakamaayo naman ni Ariza nga ang mga wala sang importante nga kadtuan ang indi lang magpalapit sa nasambit nga barangay agud malikawan ang paglaton sang balatian.
Samtang hugot naman nga ginapatuman sa barangay ang pagsuksuk sang facemask kag pag-obsebar sang social distancing.
