ROXAS CITY – Ginklaro ni Punong Barangay Ricky Donato sang Brgy. Mongpong, sini nga syudad nga wala sang pag-ilinaway nga natabo sa ila regular session sang tinalikdan nga Domingo, Pebrero 6.
Sa interview sang Bombo Radyo kay Kapitan Donato, ginpahayag sini nga kaangay sa nagakahinabo sa kongreso normal kag isa ka sahi sang healthy argument ang natabo nga pagbayluhanay nila sang mga tinaga ni Brgy. Kagawad Onarato Adelantar.
Gin-eksplekar man sini ang ginhalinan sang ila indi pagkasugtanay, bangud ang luyag sang mga kaupdanan sang nasambit nga kagawad nga ilakip sa makabaton sang P500 nga monthy allowance ang pito ka mga nagresign nga Barangay Health Workers (BHWs), apang ang punto ni Kapitan nga ipa-rehistro sila liwat sa City Health kag magpaidalom sa seminar kag training.
Suno sa Kapitan, 2016 pa sang nagresign ang 7 ka mga BHW’s sa ila barangay kag inactive na ang ila estado.
Kaangay nga ‘unfair’ man sa 16 ka mga aktibo nga BHWs kun amu lang kahupos ang pagsulod liwat sang nasambit nga mga health workers.
Ginpahayag ni Donato nga wala ini nagapamalibad sa pagpasulod sang mga BHW’s, kundi luyag lang sini nga ipaagi sa insakto nga proseso.
Gin-athag man sang Kapitan nga matunog lang ang iya tingog, kag wala ini nagpamuyayaw.
Nagpangayo man ini sang pasaylo kun na-misinterpret sang iya mga opisyales ang iya tingog.
