ROXAS CITY, CAPIZ- Opisyal na nga ginsuguran sang Schools Division Office sang syudad sang Roxas ang malapnagon nga Brigada Eskwela 2025 subong nga adlaw, Hunyo 9, 2025 sa Roxas City School of Philippine Craftsmen (RCSPC), sa Barangay Lanot, Roxas City sa idalom sang tema nga “Brigada Eskwela: Sama-sama para sa Bayang Bumabasa.”
Sa isa ka press conference nga ginpatigayon, tuman ang pagpasalamat sang talatapan sang Department of Education Capiz sa tanan nga mga partner agencies sini sa ila padayon nga suporta kag pakig-ugyon sa Brigada Eskwela.
Sa pihak nga bahin, ang nasambit nga official kick-off sang amu nga aktibidad ang gintambungan sang tiglawas sang Gobyerno Probinsyal Atty. Luvim D. Amores-PIO/ Concurrent HRMO Head nga naghatag sang mensahe sa ngalan ni Governor Fredenil H. Castro.
Yara man ang presensya sang pila pa ka mga opisyales sang Roxas City kag mga partner agencies. Gintambungan man ini sang mga opisyales sang Schools Divison Office Roxas City sa pagpanguna ni Dr. Renato Ballesteros, CESO V, mga manunudlo, mga ginikanan, mga estudaynet kag pila pa ka mga indibidwal.
Kadungan sang amu nga kahiwatan, ginpasalig ni Capiz Electric Cooperative, Inc. Supervisor Denver Albao, nga sa bahin nila sa CAPELCO, siguruhon nila ang seguridad sang mga kabataan kag manunudlo may kaangtanan sa kuryente. Iga-mentinar nila suno sa iya ang inspection sang tagsa ka mga electrical connections sang mga buluthuan, kag ginasiguro nga aktibo sila nga magaresponde sa tion may magpanawag sa ila sang bulig may kaangtanan sa electrical concerns.
Nagpasalig man ang Information Officer sang Land Transportation Office- Roxas City District Office nga si Waren Dureza nga magapahamtang sila sang mga deputized personnel sang LTO sa bug-os nga syudad agud mamonitor ang mga drivers nga nagapasobra sa pagsukot sang pamasahe sa mga estudyante, subong man sa mga estudyante nga nagadala sang mga motorsiklo nga wala sang lisensya agud malikawan ang kun ano man nga sahi sang insedente ang posible nga magluntad.
Samtang, nagpasalig man si Dr. Evelyn Bolido, Division Chief of the Health Systems Support Division, nga ipadayon nila ang ila nga programa kaangay sang pagpanghatag sang mga vitamins, pagbakuna, pag deworming kag pila pa ka mga serbisyo medikal agud mamentinar ang ikaayong lawas sang tagsa ka mga estudyante.
Tuman naman ang pagpasalamat sang talatapan sang Department of Education Capiz sa pagbuylog sang mga partner agencies agud mapabilin ang seguridad sang mga estudyante kag mga manunudlo sa tagsa ka mga buluthuan kag agud mapagkit ang target sini nga mapasangkad ang basic kag functional litercay sang mga estudyante.
