ROXAS CITY, CAPIZ- Ginalauman sang grupo nga Brotherhood of Capiz Riders nga pamatian ni Presidente Ferdinand Marcos Jr. kag pila pa ka mga opisyales sang gobyerno ang ila mga panawagan nga untaton na ang korapsyon kag pamintaha sa mga pumuluyo nga nagakahinabo sa pungsod.
Sa interview sang Bombo Radyo kay Pastor Russel Ban, Founder sang Brotherhood of Capiz Riders, iya ginpahayag nga nasum-od na ang mga pumuluyo sa paliwat-liwat nga korapsyon nga nagakahinabo.
Suno kay Pastor Ban, tion na sa karon nga ipalab-ot kag ipabutyag ang mga hibubun-ot hanungod sa nagakahinabo nga mga pagpamintaha sang mga korap nga opisyal ilabi na sa mga proyekto sang gobyerno.
Ang nasambit nga hublag-protesta ang ginhingadlan nga ‘Krusada Kontra Korapsyon’ nga patigayunon sa Setyembre 21 sa probinsya sang Capiz sa malinong nga pamaagi. Sa diin nga himuon ini pamaagi sa isa ka motorcade.
Pahayag pa nya, ang pagsuporta sa amo nga lihok, isa ka pagpakita sa mga pumuluyo sa iban nga mga probinsya sa pungsod nga ang mga pumuluyo sa Capiz, wala nagakatulog kag may nahibaluan sa nagakahinabo nga korapsyon.
Interviewed by Bombo Sunnie Mae Constantino Batencila
