ROXAS CITY, CAPIZ- Ginsiguro sang pamunuan sang Capiz Electric Cooperative Inc. (CAPELCO) nga pagahatagan sang nagakaigo nga igtalupangod ang reklamo nga ginpalab-ot sang mga kunsumidor sa Barangay Poblacion, Tapaz, Capiz batuk sa isa ka meter reader nga nagpakuno-kuno nga collector sang nasambit nga kooperatiba.
Sa interview sang Bombo Radyo kay Engineer Edgar Diaz, General Manager sang Capiz Electric Cooperative Inc. (CAPELCO), iya ginpahayag nga padayon ang imbestigasyon sang ila nga talatapan sa nasambit nga isyu agud nga indi na maliwat kag wala sang may magdugang pa nga mabiktima sang pagpanunto nga ginagamit ang pangalan sang ila nga kooperatiba.
Dugang pa sini, nga ang Capiz Electric Cooperative Inc. (CAPELCO) ang wala sang empleyado nga collector ang posisyon.
Nahibaluan nga sa ginpatigayon nga imbestigasyon natukiban nga wala na nag-duty ang nasambit nga meter reader kag awtomatiko ini nga ginkabig sang Capiz Electric Cooperative Inc. (CAPELCO) nga nag-AWOL (Absent Without Official Leave) sa diin nga ginsundan ini sang terminitaion sa serbisyo bangud sa paglapas sa Code of Ethics sang kooperatiba.
Ginganyat man ni Diaz ang mga nagpalab-ot sang reklamo nga mag-obra sang affidavit agud mahawidan sang committee on case ang amu nga isyu kag mahatagan na sang sabat kag solusyon.
Samtang, panawagan naman ni Diaz sa mga kunsumidor nga magdirekta sa pagabayad sa mga authorized bayad centers agud malikawan ang mga illegal nga transaksyon.
Interviewed by Bombo Francis Biñas
