ROXAS CITY – Preparado na ang Capiz Environment and Natural Resources Office (CAPENRO) para sa ila nga 1 Million Kahoy Project.
Ini ang ginpahayag ni CAPENRO-Head Atty. Emilyn Depon sang mainterview sang Bombo Radyo.
Suno kay Depon nga dako nga pagpanghangkat sa ila ang amo nga proyekto ilabi pa sa karon nga may ginapangatubang nga pandemiya bangud sang coronavirus disease (COVID-19).
Ginpahayag sini nga kung sang nakaligad nga mga tinuig, nahimo nila nga makatanom sang isa ka million ka mga seedlings, himuon ini karon sa sulod sang lima ka bulan.
Ini bangud mabudlay suno kay Depon ang ila nga pagtipon sang seedlings bangud ang iban diri ang gikan pa sa iban nga rehiyon.
Magasugod ang amo nga proyekto sa Hunyo 15 kag magatakop sa bulan sang Nobyembre kun sa diin ginalauman nga malab-ot ang target nga isa ka milyon ka mga seedlings.
Mahibaluan nga ang bulan sang Disyembre ang selebrasyon man sang Provincial Environment and Conciousness Month.
