PANITAN, CAPIZ- Ginpaguwa na sang Capiz 1st District Engineering Office ang sabat nila may kaangtanan sa ginpalab-ot nga reklamo ni Punong Barangay Juan Baulite kag mga opisyales sang Barangay Amilay, Panitan, Capiz natuhoy sa wala pa matapos nga flood control project.
Sa interview sang Bombo Radyo, ginsiling ni Baulite nga naglab-ot na sa ila nga talatapan ang sabat sa sulat nga ila ginpadala sa amo nga ahensya sa diin ginsiling nga bangud sa malain nga tyempo ang pagka-delay sang amo nga proyekto.
Suno kay Baulite, nagapabilin nga palamangkutanon ang amo nga sabat sang ahensya bangud nga sa bulan sang Enero tubtob Abril, tingadlaw kag indi madalom ang suba sa diin pwede gid suno sa iya nga maubra sang tayuyon ang amo nga proyekto.
Dugang pa nya, kuntani hatagan na gilayon sang aksyon kag sabat ang amo nga isyu agud nga indi man magkabalaka ang mga pumuluyo.
Pahayag pa sang natungdan, nagalaom sila nga matapos na ang amo nga proyekto agud nga indi na sila maapektuhan sang pagbinaha sa tion nga malain ang panyempo.
Interviewed by Bombo Francis Biñas
