CAPIZ-Nagpasaka na sang petition for review kag nagapangayo sang deferment of arraignment ang legal team ni Capiz 1st District Provincial Board Member Jose Fulgencio “Pepe” del Rosario may kaangtanan sa cyber libel case nga ginpasaka batok sa iya ni Dr. Mary Ann Tupaz Gumban, Former Dean sang College of Accountancy sang PHINMA University of Iloilo (PHINMA-UI).
Sa interview sang Bombo Radyo, ginpahayag ni Del Rosario nga nagahulat na lamang sila sang desisyon sang korte parte sa pag-umpisa sang arraignment.
Suno man sa iya, 95% ang kumpiyansa sang iya abogado nga madismiss ang kaso bangud kulang ini sa ‘merit’ kag wala sang kamatuoran. Apang, ang desisyon kon ipadayon ukon ibasura ang kaso yara sa gihapon sa korte.
Ang reklamo nag-ugat sa isa ka Facebook post ni Board Member Del Rosario nga naglakip sang litrato kag mga komento parte kay Gumban, kasunod sang ginreport nga indi pag-intindihanay sa pila sang isa ka cafe branch sa Iloilo City.
Nahibaluan nga ginreklamo ni Gumban ang post bangud nagapati siya nga ang mga komento nakahalit sa iya personal kag propesyonal nga reputasyon. Ang kaso ginpasaka sa idalom sang Republic Act No. 10175 ukon Cybercrime Prevention Act of 2012.
Suno sa mga dokumento sang korte nga ginpakita may kaangtanan sa kaso, nagpagwa ang Regional Trial Court, Branch 38 sa Iloilo City sang warrant of arrest batok kay Del Rosario sang Oktubre 12, 2026, nga may piyansa nga ₱48,000. Suno sa Order of Release sang Oktubre 17, 2026, ginmando ang iya pagpagwa halin sa kustodiya matapos mabayaran kag maaprubahan ang iya cash bond. Ang pagpagwa sa iya sa kustodiya wala nagakahulugan nga nadismiss na ang kaso.
Ginpahayag man ni Del Rosario nga indi siya nagapanago kag nagapadayon sa pagtuman sang iya katungdanan bilang miyembro sang Sangguniang Panlalawigan sang Capiz. Suno sa iya, ang iya mga pagliban sa sesyon may kaupod nga pormal nga leave of absence kag indi ini nagakahulugan nga ginapabay-an niya ang iya trabaho bilang opisyal sang gobyerno.
Gin-ako man sang opisyal nga una niya ini nga eksperyensya sa pag-atubang sang kasong kriminal kag nakabatyag siya sang kahadlok kag kabalaka. Apang, suno sa iya, amat-amat niya nga naangkon ang pagsalig sa pag-atubang sang proseso sang korte.
Sa pihak sini, ginpahayag ni Del Rosario ang iya personal nga pagtan-aw nga mahimo may kaangtanan sa politika ang pagpasaka sang kaso. Suno sa iya, natalupangdan niya nga nagdamo ang mga pag-atake sa iya personalidad kag karakter samtang nagapadayon ang mga serbisyo sang bag-o nga alyansa sa politika nga iya ginsuportahan. Wala pa ini napamatud-an, kag ang korte amo ang magahusga sa kaso base sa ebidensya kag nagakaigo nga proseso sang layi.
Gindugang pa ni Capiz First District Board Memeber Del Rosario nga wala siya nagahinulsol sa iya desisyon nga mag-upod sa bag-o nga alyansa, bangud nagapati siya nga may positibo nga mga pagbag-o kag pag-uswag sa distrito. Ginpasalamatan man niya ang iya pamilya, mga supporter kag mga kasimanwa nga padayon nga nagahatag sang suporta kag pangamuyo samtang ginatubang niya ang kaso.
Sa katapusan, ginpasalig ni Del Rosario sa mga Capisnon nga magapadayon siya sa pagtuman sang iya katungdanan bilang provincial board member samtang ginatubang ang kaso paagi sa legal nga proseso. Ginpahayag niya nga igatugyan sang iya legal team sa korte ang mga argumento kag depensa, kag nagalaum siya nga ang kaso husayon sing patas kag wala sang ginapanigan.
