ROXAS CITY – Wala sang dapat nga kabalak-an ang pumuluyo bangud nagapabilin nga hilway sa African Swine Fever (ASF) ang probinsiya sang Capiz.
Ini ang ginpahayag ni Provincial Veterinarian Dr. Leonel Abordo sang mainterview sang Bombo Radyo.
Suno kay Abordo nga padayon ang ila hugot nga monitoring agud malikawan nga makasulod ang ASF sa probinsiya.
Wala man sila nagauntat sa ila nga koordinasyon sa mga local government units (LGUs), mga municipal agriculturists kag mga quarantine officers.
Dako man ang pagpasalamat sang opisyal matapos nga napirmahan na sang gobernador sang probinsiya ang amended executive order nga nagasiling nga bawal na nga magpasulod sang mga buhi nga baboy kag processed pork products gikan sa iban nga lugar nga apektado sang ASF.
Padayon man ang ila nga pagpakig-angut sa Philippine Ports Authority (PPA) agud masiguro nga hilway sa nasambit nga virus ang mga gina-supply nga baboy sa probinsya.
Nagapanugyan man ini sa mga nagahupot sang baboy nga likawan ang pagbahog sa baboy sang mga kitchen left-overs ukon damog gikan sa mga restaurants, hotels kag mga karindery.
Ginpalab-ot man sini sa mga nagahupot sang baboy nga dapat nga maghalong kag siguraduhon nga gina-sunod nila ang mga pagsulundan nga ginahatag sang pila ka mga ahensya sang gobyerno kag siguraduhon man nga yara sa maayo nga kondisyon ang mga hinuptan nga baboy agud malikawan nga ma-apektuhan sang ASF.
