Naka-record ang probinsya sang Capiz sang 144 Children at Risk (CAR) cases sang 2025.
Sa ginpresentar nga data sa ginpatigayon nga Media Forum sang Regional Juvenile Justice and Welfare Committee (RJJWC) VI, 17 ka mga local government units (LGUs) ang may yara sang kaso nga na-record.
Ang Roxas City ang may pinakamataas nga kaso nga may 36, ginasundan sang Dumalag nga may 25, Mambusao nga may 20, Tapaz nga may 18, kag Panay nga may 12.
Naka-record man sang Children at Risk cases ang Dumarao nga may 11, Pilar nga may walo, Sapian nga may anum, Jamindan nga may apat, Pontevedra nga may tatlo, kag Cuartero nga may isa ka kaso.
Samtang ang mga banwa sang Dao, Ivisan, Ma-ayon, Panitan, President Roxas, kag Sigma ang wala sang reported Children at Risk cases.
Sandig sa layi, ang Children at Risk ang nagatumod sa mga kabataan nga naga-edad manubo sa 18 anyos nga vulnerable sa paglapas sa layi bangud sa problema personal, sa pamilya, sa palibot ukon sa ekonomiya.
Apisar nga wala naka-komiter sang krimen ang ini nga mga kabataan, apang sila ang nagapangabuhi sa sitwasyon nga mahimo sila mangin involved sa iligal nga aktibidad ukon makalapas sang layi.
Ang Children at risk ang ginalakipan sang mga kabataan nga naka-eksperyensya sang pag-abadonar, pagpang-abuso, mga nagaliho-liho sa dalan, exposed sa iligal nga droga ukon nagdako sa komunidad nga apektado sang kapintas kag criminal activities.
Suno sa talatapan, ang nasambit nga figures ang nagapakita nga kinahanglan ang mabaskog nga mga programa nga may katuyoan nga maproteheran ang mga kabataan kag malikaw sila sa pagkaangot sa mga iligal nga buluhaton.
Importante pahayag sang RJJWC ang suporta sang pamilya, edukasyon, counseling kag community-based interventions agud mabuligan ang mga vulnerable children.
