ROXAS CITY – Magasugod na sa ang Online Enrolment System sang Capiz National High School sa Hunyo 1, 2020.
Ini ang ginkompirmar mismo sang principal nga si Rita Villareal sang mainterview sang Bombo Radyo.
Suno kay Villareal nga pinaagi sa ila Facebook page nga Capiz National High School Website, ila gin-post ang link kun sa diin mahimo maka-access para sa online enrolment.
Ginpahayag ni Villareal nga ila paga-obserbahan sa sulod sang duha ka semana kun ano kadamo ang maga-enrol online.
Suno diri nga may survey man nga pagasabton ang mga kabataan kag ginikanan nga amo ang gamiton para sa pagtumod kun ano ang mangin desisyon sang eskwelahan natuhoy sa ‘modalities’ ukon ‘mode of learning’ nga ila pagagamiton sa pagbukas sang klase sa Agosto 24.
Ginklaro man ni Villareal nga may yara man sila sang enrolment form para sa mga wala sang access sa internet.
Ginpanindugan naman ni Villareal nga nakahanda sila nga magsunod sa mandu sang gobyerno kun ano nga pamaagi sang pagtudlo ang ila himuon sa pagsugod sang klase bangud sang ginapangatubang sa karon nga coronavirus disease (COVID-19) pandemic.
