ROXAS CITY – Hugot sa karon nga ginatuman sang pamunuan sang Capiz Police Provincial Office ang mandatu ni Capiz Governor Esteban Evan ‘Nonoy’ Contreras sandig sa Executive Order No. 20-C, Series of 2020 natuhoy sa travel/border restrictions sa probinsiya.
Ini ang ginpahayag ni CPPO-Provincial Director PCol. Julio Gustilo Jr. sang mainterview sang Bombo Radyo.
Suno sa opisyal nga wala pa man ang nasambit nga EO sang gobernador kag ginpaidalom sa Modified General Community Quarantine ukon MGCQ ang probinsya, nagapabilin ang presensiya sang mga kapulisan sa mga border control checkpoints.
Mahibaluan nga ginhatagan lamang sang tubtob Hulyo 5 ang mga Capizeño gikan sa kaiping nga ka-probinsiyahanan nga makapauli.
Sumugod Hulyo 6, 2020, ang tanan nga magasulod sa probinsiya, makabig na nga Locally Stranded Individuals (LSI’s) kag kinahanglan nga magpaidalom sa 14-day quarantine.
Pahanugutan naman nga magsulod sa probinsiya ang mga Authorized Persons Outside Residence ukon APOR kapareho sang mga empleyado sang gobyerno, mga indibidwal nga nagatrabaho sa probinsiya, mga pasyente nga nagapabulong sa probinsiya, mga medical personnel, mga health workers, mga first responders, kag mga emergency personnel, kag mga locally stranded individuals nga ang ila nga pagpauli ang ginpatigayon sang LGU’s.
Kalakip pa sa makasulod sa probinsiya ang mga medical personnel, armored cars, stranded OFWs kag delivery trak nga nagakarga sang essential goods.
Pahanugutan lamang nga makasulod ang mga delivery vans sang essential goods apang kinahanglan nga mag-agi sa maid-id nga monitoring depende sa lugar nga ginhalinan sini.
Kinahanglan nga magpresentar sang ila valid ID, travel order, certificate of employment, health declaration kag medical certificate nga nagapamatuod nga indi sila infected sang nasambit nga virus.
