Nagpaandam ang Capiz Police Provincial Office sa publiko nga mangin mahinalungon subong nga BER-months bangud nagabantay naman ang mga tawo nga may malain nga tinutuyo.
Sa interview sang Bombo Radyo kay Police Captain Merry Chris Dela Cruz, Public Information Officer sang Capiz Police Provincial Office, iya ginpahayag nga kun magpadulong sa matawo nga lugar kaangay sang merkado, plaza kag mall, indi na magdala sang madamo nga kwarta kag indi magsuksok sang mga alahas agud malikawan nga mangin biktima.
Suno kay Dela Cruz, may yara na sang 218 nga mga nagkalain-lain nga insidente sang Eight Focus Crimes subong nga tuig sa probinsya sa diin ginalakipan ini sang Murder, Homicide, Physical Injury, Rape, Theft, Robbery, Car theft, kag Motorcycle Theft.
Ang may pinakamadamo nga narekord nga insidente amo ang kinawatay.
Pahayag niya, nagakadapat nga mangin vigilant ang publiko ilabi na nga madamo subong ang nagatanyag sang ano man nga serbisyo nga nagaresulta sa pagpang-scam.
Ginasiguro sang nagtungdan nga may yara sang mga kapulisan nga naka-standby sa mga terminal, park kag merkado.
-INTERVIEWED BY: Bombo Jessa De Los Santos
