Preparado na ang katapo sang Capiz Police Provincial Office (CPPO), para sa palaabuton nga Midterm Elections 2025.
Sa interview sang Bombo Radyo sa Officer in Charge nga si Pcol. Albert Tapulao, ginpahayag sini nga mangin kaupod nila sa amu nga operasyon ang hanay sang Philippine Army, Philippine Coast Guard (PCG) kag iban pa nga mga Uniform Personnel nga magabanatay sa palibot agud mapabilin ang kalinong kag seguridad sang mga magapapili kag mga botante.
Suno kay Tapulao, ila man nga ginahatagan sang importansya kag hugot nga seguridad ang mga lugar nga yara sa idalum sang red category kaangay sang banwa sang Pilar, President Roxas kag Tapaz agud malikawan ang mga indi maayo nga insidente.
Ginpasiguro man sini nga magatingub ang ila bug-os nga pwersa agud magtakop nga matawhay kag matalunsay ang pagpiniliay sa masunod nga tuig.
