Magabaton sang pagpasidungog ang Capiz Provincial Bantay Dagat sa Gawad Parangal sa Kabalikat ng Pangisda at Yamang Tubig sang Department of Agriculture-Bureau of Fisheries and Aquatic Resources.
Sa interview sang Bombo Radyo kay Mr. Glenn Be Up, Assistant of Department Head Environment and Natural Resources Office kag Capiz Provincial Bantay Dagat Coordinator, iya ginpahayag nga ang ini nga pagkilala nagapakita sang suporta, kontribusyon kag padayon nga pagproteher, kag pag preserbar sang fisheries kag aquatic resources sa probinsya sang Capiz.
Suno kay Be Up, ini man isa ka pamatuod sang ‘team effort’ kag wala sang untat nga ‘commitment’ sang tanan nga katapo sang grupo.
Nahibaluan nga ang awarding pagahiwaton sa closing ceremony sang 63rd Fish Conservation Week Celebration sa maabot nga Setyembre 18, 2026, sa isa ka hotel sa Quezon City.
Nagpasalig man ang natungdan nga magapadayon ang mga programa sa pagkonserbar sa mga dunang mangggad sa pagpatuman sa mga kasuguan sa pangisdaan kag pag proteher sa mga coastal resources bilang kabahin sang responsibilidad sang probinsya sa pag-atipan sa palibot kag pangabuhian sa mga pumuluyo.
