Preparado na ang Capiz Provincial Government para sa palaabuton nga Capiztahan 2026 kun sa diin may yara sang nagkalain-lain nga aktibidad para sa pumuluyo, ilabi na sa mga pamatan-on.
Sa interview sang Bombo Radyo kay Atty. Stephen Alquiza, Local Youth Development Officer sang Capiz, iya ginpahayag nga bilang kabahin sang selebrasyon may yara sang ginapatigayon para sa youth nga aktibidad kaangay sang Hangaway kag Lin-ay sang Capiz.
Suno kay Alquiza, ang amo nga mga aktibidad nagahatag sang kahigayunan sa mga kabataan nga mapakita ang ila talento, abilidad kag kumpyinsa sa kaugalingon.
Dugang pa ni Alquiza, nga ang Capiztahan indi lamang selebrasyon kundi isa man ka plataporma agud mapauswag ang talento sang kabataan kag mapabakod ang ila papel sa pagpadayon sang kultura kag tradisyon sang probinsya.
Maga-umpisa ang nasambit nga selebrasyon sa April 13 tubtob 19 2026.
