ROXAS CITY -Nakapauli na sa probinsiya sang Capiz ang isa ka Capizeña OFW nga ginasakit kag ginadalukan sang pagkaon sang iya employer sa Saudi Arabia.
Indi makapati tobtob sa karon si Jessiebyl Beluan Petallar 42-anyos sang Barangay Bita, Dao, Capiz sa madasig nga proseso sa iya pagpauli sa Pilipinas, agud makapalayo na sa mapintas nga employer.
Maluha luha nga ginsaysay sang ginang ang iya inagihan sa kamot sang babaye nga employer kag sang anak sini.
Nagsugod ang pagpamintas sa iya sang amo nga babaye sang malapit na lamang nga matapos ang iya kontrata bilang domestic helper.
Bisan sa simple lamang sini nga pagkalipat sa pagsuksok sang mahaba nga bayo ukon cap sa buhok, ginatampa na ini kag ginahampak sang hairbrush, bangud nahibaluan sini nga nagapangimon sa iya ang babaye nga amo.
May bes man sadto nga nakibot na lamang ini sang ginkuga sang 15-anyos nga anak sang employer kadungan ang paghampak sa iya ulo sang hairbrush sang amo nga babaye.
Nakatigayon lamang ini nga makahalin sa balay sang amo sang nagsabat na siya bangud indi indi na sini maagwantahan ang pagsakit sa iya.
Apang ang masubo lamang bangud wala sini makuha ang apat ka bulan nga sweldo.
Nagpanugyan man ini sa iban nga nagaplano nga magtrabaho sa iban nga pungsod nga siguraduhon ang pagakadtuan nga nasyon ang wala ginadumilian sang gobyerno sang Pilipinas.
Sa pihak sang iya naagyan, handa ini sa gihapon magtrabaho sa iban nga pungsod, apang indi lamang sa Saudi Arabia.
Samtang nagpasalamat man ini sa talatapan sang bise gobernador nga nagpakig-angut sa mga concerned agencies agud mapadasig ang pagpauli sang nasambit nga OFW sa Pilipinas.
