ROXAS CITY, CAPIZ – Isa ka dako nga kadungganan ang nahatag sang Capiz State University (CAPSU) Main Chorale sa Pilipinas matapos nakuha ang madamo nga prestihiyoso nga awards sa Borneo International Vocal Arts Festival nga ginpatigayon sa Miri, Sarawak, Malaysia.
Sa interview sang Bombo Radyo kay Dr. Vivian Apuang, Conductor kag Adviser sang CAPSU Main Chorale, ginpakigbahin niya ang tuman nga kalipay sa kadalag-an sang grupo sa international stage.
Ginpakita sang mga miyembro ang indi matupungan nga talento sang mga Pilipino sa patag sang musika, matapos makuha ang apat nga gold medals kag duha ka silver medals.
Yari ang mga nadag-an sang grupo:
Grand Prix Champion – Absolute Winner for Choir Competition
Grand Prix Champion – Absolute Winner for Vocal Solo Competition.
Pila pa sa mga indibidwal nga nagdaog amo sanday: Category Winner – Adult Duet: Franz Ignas Bofill kag Danriz Ansel Eudela
Category Winner – Adult Pop: Ralph Ronan Avelino
Nakuha man sang CAPSU Main Chorale ang: Duha ka Silver Award para sa Musica Sacra kag Folkloric nga category.
Ginpahayat sang natungdan nga indi lang ini kadalag-an sang CAPSU, kundi sang bug-os nga Roxas City kag Probinsya sang Capiz.
Isa ini ka pamatuod suno sa iya sang dedikasyon, disiplina, kag talento sang mga Pilipino nga ginakilala sa kalibutan.
