Gintawag sang Catholic Bishops’ Conference of the Philippines(CBCP) bilang kadalag-an sang tumuluo, hustisya, kag suporta sang komunidad ang dalayon nga pagbalik sa pungsod ni Mary Jane Veloso.
Mahibaluan kaina sang aga, nag-abot si Veloso sa Pilipinas matapos ang halos isa kag tunga nga dekada nga pagkapreso sa Indonesia.
Suno kay Antipolo Bishop Ruperto Santos, ang nagserbi nga vice chairman sang CBCP Episcopal Commission for the Pastoral Care of Migrants and Itinerant People, ang homecoming ni Veloso simbolo sang paglaum kag gahum sang pagpangamuyo.
Isa man ini ka mapuslanon nga tikang bangud nadungan ini sa International Migrants Day.
Kaangut sini, wala pa diri nagatakop ang pagpakigbato para kay Veloso bangud kinahanglan pa suno diri liwat nga magbuligay sa pagpangamuyo agud dalayon na nga gawaran si Mary Jane sang clemency.
Sa pagbalik ni Veloso sa Pilipinas, liwat sini ginpanindugan ang iya pagiging inosente kag pagkabiktima nagikan sa mga sindikato sang human kag drug trafficking.
Matandaan nga si Veloso ang una nga na-sentensyahan sang drug trafficking sadtong 2010 sa Indonesia matapos siya nga madakpan sang masobra 2.6 kgs nga heroin kag ginabulubanta may balor nga $500,000.
Ang nasambit nga kontrabando, ginapatihan nga nagikan sa mga drug syndicate kag konektado sa iya mga recruiter.
