Ginasuri na sang Philippine National Police Anti-Cybercrime Group ang mga CCTV footage nga may kaangtanan sa insidente sang pagpinalupok sa Senado sang nagligad nga Mayo 13.
Suno sa PNP, ginturn-over na ang mga video gikan sa sulod kag guwa sang Senate premises agud ma-preserve kag ma-analisa bilang kabahin sang padayon nga imbestigasyon.
Ginpahayag ni PNP spokesperson Police Brigadier General Randulf Tuaño nga ginahulat na lamang sang imbestigative team ang resulta sang analysis sang Anti-Cybercrime Group. Ginadugang man sa ebidensya ang mga body camera footage, video sang media, kag personal recordings nga mahimo makabulig sa paghibalo sang natabo sa insidente.
Samtang, nagahimo naman sang 3D reconstruction ang PNP Forensic Group agud masuta ang direksyon sang mga bala, mga basiyo sang bala, kag iban pa nga ebidensya nga nakuha sa lugar. Suno sa PNP, makabulig ini agud mahibaluan kon diin naghalin ang mga pagpinalupok kag kon diin naka-posisyon ang mga armado nga persona nga nalakip sa insidente.
Nagpanawagan man ang PNP sa publiko nga maghulat sang opisyal nga resulta sang imbestigasyon kag likawan ang pagpalapta sang mga espekulasyon may kaangtanan sa insidente sa Senado.
