ROXAS CITY – Ginkakibot ni Mr. Emman Navaro CEO Founder sang Samaritan Bayanihan Inc., angut sa pagpangluthang-patay sa isa nila sini ka miyembro nga si Sandra Baluco kahapon sang aga Nobyembre 13, 2023 sa Barangay Poblacion Elizalde, President Roxas, Capiz.
Matandaan nga wala nakasalbar sa kamatayon si Baluco, matapos ginluthang sang tatlo ka beses sa ulo sang wala pa matumod nga suspek samtang maga-park kun tani ini sang iya motorsiklo.
Sa interview sang Bombo Radyo kay Navaro, ginsaysay sini nga isa ka maayo kag active member sang Samaritan Bayanihan Inc., si Baluco kag sa pagkamatuod suno diri apisar nga bag-o pa lamang ini sa iya nga posisyon, nakitaan na ini sang abilidad kag may dako nga mabulig sa ila grupo.
Suno kay Navaro, antes pa nangin staff si Baluco nagsugod ini nga isa ka ordinaryo nga miyembro sang Samaritan Bayanihan Inc.,.
Mahibaluan nga 3 tubtob 4 ka bulan pa lamang nga nagatrabaho bilang Secretary Treasurer si Baluco nga na-assign sa President Roxas.
Ginpahayag man sini nga wala sila sang may natandaan nga may yara ini sang kontra ukon nakaaway sa ila miyembro, apisar nga may pagka-istrikto ini pag-abot sa mga pagsulundan apang makabig ini suno diri nga maayo magdumala sang iya mga nasakupan.
Bangud sa natabo, tuman sila nga nasubuan subong man sa nabilin sini nga pamilya.
Sa karun, temporaryo suno diri nga ginsarado ang ila opisina para man sa kaluwasan sang ila mga miyembro.
