Nagpanawagan si Chinese Ambassador Huang Xilian sa Pilipinas kag China nga ibalik ang dayalogo kag pamatian ang panawagan sang pumuluyo nga pilion ang kooperasyon sang sa konflikto.
Ang pahayag ni Huang kadungan sang selebrasyon sang ika-50 nga anibersaryo sang diplomatic relations sa tunga sang duha ka pungsod sadtong Sabado, Hunyo 7, 2025.
Ang kahiwatan gintambungan ni Presidente Ferdinand Marcos Jr., mga senador, mga lider sang negosyo, kag mga tiglawas sang Pilipino-Chinese nga komunidad.
Apang ang nasambit nga pahayag ang nag-abot sa tunga sang nagapadayon nga tensyon sa West Philippine Sea (WPS), sa diin makapila ka beses nga ginlapas sang China ang exclusive economic zone (EEZ) sang Pilipinas kag sa gihapon wala sini ginakilala ang 2016 arbitral ruling nga pabor sa iya.
Sa idalum sang administrasyon ni Marcos Jr., nangin mabaskog kag hayag ang panindugan sang pungsod sa pagdepensa sang iya soberanya, samtang nagapadayon ang presensya sang mga barko sang China kag ang paggamit sang water cannon batok sa mga Pilipino nga mangingisda.
Ginhatagan pagtamod ni Huang nga malapit nga magkaingod ang Pilipinas kag China nga indi mabulag. Nagalaum ang China nga mas madamo pa nga mga Pilipino ang magabuligay agud mapasanyog ang relasyon sang duha ka pungsod.
Samtang, ginkwestyon naman ni Defense Secretary Gilberto Teodoro Jr ang sinseridad sang China sa bagay sang dayalogo, kasunod sang militarisasyon sini sa ginabaisan nga mga teritoryo.
