ROXAS CITY -Nagalaum si City Councilor Paul Ivan Baticados nga mapapasar sa Sangguniang Panlungsod ang ginaduso nga ordinansa natuhoy sa paggamit sang bisikleta bilang alternatibo nga transportasyon sa siyudad.
Ginpahayag ni Baticados nga dako ang mabulig sang bisikleta bilang isa ka sahi sang alternatibo nga transportation bangud magluwas nga may yara sang maayo nga epekto sa lawas sang isa ka siklista, wala pa sang halit nga matuga sa palibot.
Magluwas diri, nakita man ni Baticados nga madamo na sang mga indibidwal nga may yara sang huyog sa pagbisikleta rason nga luyag man sini nga marekognisar ang mga siklista sa siyudad.
Samtang kasunod sini, kabahin man sa ginaduso ni Baticados ang pagpahamtang sang mga bicycle lanes sa mga karsadahon.
Suno kay Baticados kinahanglan nga may yara sang bicycle lane sa mga karsadahon agud mapasiguro ang seguridad sang isa ka siklista.
Kalakip man sa ginaduso sini sa Roxas City Bicycle Ordinance of 2020 ang pagpahamtang sang mga parking spaces para sa mga bisikleta, pagtanyag sang lokal nga gobyerno sang mga bisikleta nga sarang mautang sang mga empleyado sang gobyerno kag iban pa.
Padayon naman nga ginatun-an ni Baticados ang lugar nga pagahamtangan sang mga bicycle lanes pinaagi sa pagkonsulta sa mga iban nga ahensya sang gobyerno.
