Ginaalegar ginhold-up ang isa ka collector sa Barangay Tamulalod, Dumarao, Capiz, kadungan sa pagsaulog sang Valentine’s Day.
Ang wala na ginhingadlan nga biktima ang yara sa legal nga pang-edaron kag isa ka collector sang banko.
Sa pagpakig-angut sang Bombo Radyo kay PLT. Russel Husmalaga, Deputy Chief of Police sang Dumarao MPS, ginpahayag nga personal nga nagpadulong sa istasyon sang Dumarao MPS ang biktima agud nga i-report ang pagpanghold-up sa iya.
Pahayag pa sang hepe nga samtang ginasubay sang biktima ang dalanon sa amo nga lugar hinali ini nga ginhold-up sang duha ka kalalakinhan.
Suno pa nga nataban sang mga suspetsado sa biktima ang nakolekta nga cash nga nagabalor sang P40,000 kag isa ka unit sang cellphone pinaagi sa pag-ambang kag pagtaya sang armas-luthang.
Sa karon, nagapadayon ang maid-id nga imbestigasyon sang mga kapulisan agud matumod ang may kahimuan sa nasambit nga insidente.
