ROXAS CITY – Nagahilapit na ang adlaw sang pagpiniliay sa pungsod Pilipinas, nga pagapatigayunon sa maabot nga Mayo 9.
Bangud sini, may pila ka mga pahanumdom ang Commission on Elections (COMELEC) sa mga botante, ilabi na sa mga makabig ‘first time voters.’
Sa interview sang Bombo Radyo kay Mr. Louell Firmalino, tagpamaba sang Comelec-Capiz, ginpahayag sini nga dapat temprano pa magpadulong ang mga botante sa ila mga assigned voting precinct.
Magasugod ang pagboto alas-6 sa aga tubtob alas-7 sa gab-i.
Ginapahibalo man sang ahensya nga mangin strikto sila sa pagpatuman sang pagsulondan sa sulod sang hulot nga ginapatigayon ang pagbinotohay.
May igapahamtang nga temperature check sa entrada sang pertahan, kag antes magsulod, kinahanglan nga ginahawidan na sang botante ang iya precinct number, sa tion nga may yara na ini sang balota, magboto pinaagi sa pag-shade sang oblong.
Bawal ang pagbutang sang ekis ukon tuldok, ginadumilian man ang pagbasa ukon pagyukot sang balota bangud tuman ini ka sensitibo.
Magboto lamang sang gina-required nga numero.
Mahimo nga mag-undervote ukon kulang sa numero nga required botohon, apang mangin imbalido ang balota kun magasobra sa gintalana nga numero ang gin-shade sang botante.
Personal man ang pagboto, kag magpahibalo sa BEI kun nagakinahanglan sang assistance.
Hugot man nga ginapagbawal ang pagkuha sang litrato sa sulod sang voting precinct ilabi na sa mga voting materials, bangud isa ini ka sahi sang election offense kag mahimo nga mapanabat.
Pagkatapos sang pagboto, ilunod ang balota sa Voting Counting Machine (VCM) kag matawhay nga magguwa gilayon sa voting precinct.
Nagapangayo man sang kooperasyon ang COMELEC para sa isa ka malinong kag matawhay nga eleksyon sa Mayo 9.
