ROXAS CITY – Nagabaton na ang Commission on Elections sang mga botante nga luyag magparehistro para sa May 9, 2022 local & national elections.
Ini ang ginpahayag ni City Election Officer Atty. Jomar Alyzar Betita sang mainterview sang Bombo Radyo.
Suno diri nga magalawig ang voter’s registration tubtob sa Setyembre 30, 2021.
Ginpahayag sini nga magabukas ang ila talatapan humalin alas 8 sa aga tubtob alas 3 sa hapon.
Ginaganyat man sini ang mga magapa-rehistro nga i-download ang application forms sa ila nga website.
Suno kay Betita nga ang Comelec Office sang siyudad ang sarang lamang makaakomodar sang 100 ka mga indibidwal sa isa ka adlaw samtang sa iban nga kabanwahanan, tubtob lamang sa 50 ang ila maakomodar sa sulod sang isa ka adlaw.
Magapatuman man sang mga anti-COVID precautions ang talatapan.
Kalakip na diri ang paglimita sa numero sang mga pasudlon nga aplikante sa sulod sang talatapan agud masiguro nga masunod ang physical distancing.
Nakasuksok man dapat sang face mask kag face shield ang kada aplikante kag ginaganyat man ang mga ini nga magdala sang kaugalingon nga ballpen.
May yara naman sang express land para sa mga senior citizen, persons with disabilities (PWD’s) kag nagabusong apang nagapangabay ang talatapan sa mga senior citizens nga ipaiway anay ang pagguwa samtang may ginapatuman pa nga curfew.
Igapasiguro man sang talatapan ang pagpatigayon sang disinfection kag decontamination sa opisina kada adlaw.
