ROXAS CITY – Ginpahayag ni first district Congressman Emmanuel ‘Tawi’ Billones, Sr. nga una sa ila prayoridad ang pagsunod sa health protocol sang gobyerno, sa ila ginapatigayon nga paglibot sa mga kabarangayan sa probinsya.
Sa interview sang Bombo Radyo kay Billones, ginpahayag sini nga ginapasiguro sang ila grupo nga nagasuksok sila sang face mask kag ginapatuman ang social distancing.
Isa na diri ang pagpadulong sang ila grupo sang bulan sang Enero, sa Barangay sang Bantigue kag Ameligan, banwa sang Pontevedra, kun sa diin, ginpahayag sang Kongresista nga ‘first time’ ang natabo sa ila nga ginpakita nga akto sang mga Barangay Kapitan.
Nahibaluan nga may mga alegasyon nga may pagpang-harass nga natabo sa nasambit nga barangay, apang sa interview sang Bombo Radyo kay Punong Barangay Rubenato ‘Rubing’ Alonzo sang Brgy. Bantigue, ginklaro sini nga wala siya nagpangtabog sa grupo sang Kongresista apisar wala ini makahibalo nga may matabo nga daw kaangay ‘caucus’ kundi nagsiling ini nga ipatuman ang social distancing bangud sa pagtumpok sang mga tawo.
Apang, ginsiling ni Billones, nga ang ila pagkadto sa amu nga barangay amu ang makahatag sang gamay nga ayuda para sa mga pumuluyo kag wala sang ginapili mapaapin man kontra.
Kuntani, suno pa diri, nga magbinuligay nalang para sa kaayuhan sang mga pumuluyo.
