Indi na dapat palawigon pa ang pag-cross examine sang ikaduha nga testigo sa una nga article of impeachment batuk kay Vice President Sara Duterte.
Sa interview sang Bombo Radyo kay Atty. Joenar Pueblo, President sang Arbitration Center in the Visayas, iya ginpahayag nga nagapati siya nga nagabalik-balik na lamang ang mga pamangkot sang defense panel sa pareho nga isyu, partikular sa video nga nagalakip sang kontrobersiyal nga pahayag ni Vice President Duterte.
Suno kay Pueblo, kon kaangay sa gihapon ang mangin direksyon sang cross examination, posible nga maglawig ang proseso sang impeachment trial nga wala sang madugang nga importante nga impormasyon sa record sang korte.
Pahayag pa niya, kon padayon nga magbalik-balik ang pareho nga mga punto, nagapakita ini nga mabudlay mapamatud-an ang mga alegasyon batuk sa bise presidente.
Sa pihak sini, ang desisyon kon tubtob sa diin ang cross examination kag kon san-o magapadayon sa masunod nga testigo yara gihapon sa impeachment court.
