ROXAS CITY – Nagdangat na sa 460 ka panibag-o nga kaso sang Coronavirus Disease ukon COVID-19 matapos narekord ang 52 ka mga panibag-o nga kaso kahapon nga adlaw, Setyembre 26, 2020.
Suno kay Provincial Health Office information officer Ayr Altavas, ini na ang pinakamataas nga nabalhag nga kumpirmado nga kaso sang COVID-19 sa probinsya sang Capiz sa sulod sang isa ka adlaw.
44 sa panibag-o nga positibo nga kaso ang nagikan sa syudad sang Roxas; lima (5) sa banwa sang Panitan; kag tag-isa (1) gikan sa banwa sang President Roxas, Tapaz, kag Panay.
Sa nasambit nga numero, 155 diri ang aktibo nga kaso, 278 ang naka-recover kag 27 na ang napatay.
Kadungan sini padayon ang panugyan sang PHO sa publiko nga sundon ang nagakaigo nga health protocol agud malikawan nga malatnan sang sini nga balatian.
