Ginpanawagan ni Parañaque 2nd District Representative Brian Yamsuan sa Kongreso nga paspason ang pagpasa sang proposed Cybersecurity Act bangud sa nagadamo kag nagalala nga cyber attacks sa pungsod kag sa bug-os nga kalibutan. Suno sa iya, kinahanglan nga mapalig-on ang proteksyon sang mga kritikal nga impormasyon kag digital systems sang gobyerno agud malikawan ang posible nga pag-hack kag iban pa nga online nga pameligro.
Ginhimo ni Yamsuan ang panawagan matapos ang pahanumdom sang International Monetary Fund ukol sa nagataas nga peligro sang cyber attacks nga nagagamit sang Artificial Intelligence ukon AI. Ginbanggit man niya ang nagluntad nga data breach sa isa ka learning management system nga ginagamit sang pila ka unibersidad sa Pilipinas nga nagbutyag sang pribado nga impormasyon sang mga estudyante.
Dugang pa sini, ginpabutyag sang kongresista nga indi lamang ordinaryo nga pagpanakaw sang datos ang cyber attacks kundi isa man ka dako nga hulga sa seguridad sang pungsod kag sa publiko. Gin-ulat man sang Armed Forces of the Philippines nga padayon nila nga ginatubang ang mga cyber attacks nga may kaangtanan sa tensyon sa West Philippine Sea.
Suno sa panukala, pagatukuron ang National Cyber Security Agency kag isa ka unified national cybersecurity network agud mapadasig kag mapaisa ang depensa sang tanan nga ahensya sang gobyerno kontra sa digital threats.
