Ginmanduan ni Department of Agriculture (DA) Secretary Francisco Tiu Laurel Jr., ang National Food Authority (NFA) nga magasugod na sa pagsaylo sang ila buffer stocks sa Visayas bilang preparasyon sa paglunsar sang P20/kilo rice program sa idalum sang departamento.
Suno sa tiglikom, magalab-ot sa pila ka semana ang pagsaylo sang rice stocks gikan sa mga bodega sang NFA, partikular ang halin sa mga bahin sang Mindoro pakadto sa nagkalain-lain nga bahin sang Visayas.
Antes sini, nakakuha sang clearance ang ahensya para sa pagbaligya sang bugas gikan sa Commission on Elections (Comelec) bilang kabahin sang campaign promise ni Presidente Ferdinand Marcos Jr. sang ini napilian sang tuig 2022.
Samtang, ang buffer stocks gikan sa Mindoro ang igabutang sa mga bahin sang Visayas nga limitado ang produksyon sang bugas kaangay sang Cebu, Negros Island, Samar kag Leyte.
Ginasuportahan man sang mga lokal nga panguluhan sa Visayas ang ini nga lihok sang DA kag handa nga mag-intra sa sini nga programa.
