Ginpalawig sang Department of Agriculture (DA) ang deadline sa pagproseso sang mga permit sa pag-import sang isda kag seafood tubtob sa katapusan sang Hunyo, agud tugutan ang mga importer nga magsunod sa isa ka bag-o nga polisiya nga nagatuyo sa pagsabat sang food inflation kag pag-establisar sang supply para sa mga industriya pareho sang turismo kag pagkamaabi-abihon.

Ang lihok ang nagasanto sa direktiba ni Presidente Ferdinand Marcos Jr. nga himuon nga mas sistematiko ang importasyon sang isda agud makatuga sang trabaho kag makaganyat sang investment.

Suno sa ahensya, sa kabug-usan nga 25,000 metric tons sang seafood nga ginapahanugutan nga ma-import para sa food service sector, 25% pa lang ang na-import.

Suno kay Agriculture Secretary Francisco Tiu Laurel Jr., tuman ka lip-ot ang nauna nga deadlines kag wala na sa season ang pila ka mga produkto gikan sa ginhalinan nga pungsod.

Lakip sa ginapahanugutan nga import amo ang mga produkto nga kulang sa lokal nga merkado kaangay sang salmon, bakalaw, tuna by-products, pusit, scallops, kugita, kag lobster. Ang mga sardinas amo lamang ang local species nga gin-aprubahan para sa pag-import agud mapahagan-hagan ang inflation sa tion sang off-season.

Natalupangdan man nga ang mga importer lang nga accredited sa idalom sang Fisheries Administrative Order (FAO) 195 ukon rehistrado sa FAO 259 ang mahimo mag-request sang Certificate of Necessity to Import (CNI).

Ginalauman sang DA nga ang bag-o nga extension magatugot sa bug-os nga paggamit sang gin-aprubahan nga import volume.

Samtang, nag-umpisa man ang annual closed fishing season sa Davao Gulf humalin Hunyo 3 tubtub Agosto suno sa Bureau of Fisheries and Aquatic Resources (BFAR).