Nagpakigsapol si Department of Agriculture (DA) Secretary Francisco Tiu Laurel Jr., sa mga regional managers sang National Food Authority (NFA) agud masiguro ang kalidad sang bugas nga ginabaligya sa idalum sang programa ni Presidente Ferdinand Marcos Jr. nga amo ang P20 nga bugas kag nagalab-ot sa mataas nga kalidad nga standards.
Suno sa tiglikom, ang P20 nga bugas isa ka subsidized nga programa nga nagahatag sang oportunidad sa departamento nga mabag-o ang madugay na nga pagtamod sang publiko nga ang NFA rice ang manubo ang kalidad.
Suno sa iya, tion na nga lubos nga bag-uhon ang ini nga mga opinyon nahanungod sa bugas gikan sa mga magagmay nga mangunguma kag ipakita nga ang gobyerno may ikasarang sa paghatag sang mataas nga kalidad nga bugas sa manubo nga presyo.
Ginsiling sini nga ini nga programa nagapakita man kon ano ka manamit kag kataas ang kalidad sang humay nga ginaani sang mga lokal nga mangunguma sa pungsod.
Samtang humalin sang ginlunsar ang programa sadtong Mayo 1, madamo na sang mga konsumidor ang nagpasalamat kag nagdayaw sa manamit nga kalidad sang NFA rice.
Gilayon nga nakita sang DA nga labi pa gid nga mangin popular ang pagbaligya sang NFA rice, indi lang tungod sa masarangan sini nga presyo kundi tungod man sa lain nga kalidad sini.
