Dakop ang apat ka persona sa ginpatigayon nga drug buybust operation sang Philippine Drug Enforcement Agency (PDEA) Iloilo sa Sitio Bangbang Barangay Inzo, Roxas City.
Ginkilala ang mga nagkaladakpan nga sanday alyas Anton, 44-anyos , mga bata sini nga sanday alyas “JK”, 19-anyos kag alyas “Ton-ton”, 18-anyos, lunsay residente sang nasambit nga lugar kag alyas “Toto”, 24-anyos nga residente naman sang Barangay Tanque sining siudad.
Sandig sa pahayag ni Inv. Agent Jose Ramir Batuigas, Team Leader sang PDEA-Iloilo, ginakabig nga high value individual (HVI) si Anton Eduardo ang 18-anyos nga subject sa operasyon kag madugay na nga gina-monitor sang PDEA sa iligal sini nga aktibidades.
Nakuha sa paghinakop sang nasambit nga mga persona ang 10 tanan ka sachets sang suspected shabu lakip na ang P6,600 nga buy busy money kag mga drug paraphernalia.
Madumdoman nga ang amay nga si Antonio Eduardo Jr., anay na nga napreso sa kapareho nga ilegal nha buluhaton. Kaso nga paglapas sa Republic Act 9165 ukon Comprehensive Dangerous Drugs Act of 2002 ang igapasala sang otoridad sa mga suspetsado.
Sa karon, padayon pa ang maid-id nga imbestigasyon sang mga kapulisan angut sa mga nasambit nga mga suspetsado.
