Ginpaidalum sa state of calamity ang bug-os nga probinsya sang Davao Oriental pagkatapos sang asud-asud nga mabaskog nga linog kag padayon nga aftershocks nga nagtuga sang daku nga kahalitan sa imprastraktura kag palangabuhian sang mga pumuluyo.
Suno kay Director Ednar Dayanghirang, regional director sang Office of Civil Defense (OCD) Region 11, nagapadayon sa gihapon ang monitoring sa mga apektado nga lugar.
Magluwas sa probinsya, nagdeklara man sang state of calamity ang mga banwa sang Caraga, Manay, Tarragona, kag Baganga bangud sa kadakuon sang kahalitan.
Suno sa report, pila ka mga building kag pasilidad ang indi na safe nga gamiton pagkatapos sang linog, samtang nagapabilin nga alerto ang mga lokal nga otoridad sa posibilidad sang dugang nga mga aftershocks.
Sa tunga sang “Trembler months,” ang Office of Civil Defense nagapanawagan sa publiko nga mangin mabinantayon, magsunod sa mga abiso sang mga otoridad, kag magkooperar sa mga tikang sang gobyerno agud mapadasig ang rehabilitasyon sa mga apektado nga lugar.
