Nagdangat na sa 12 ang napatay sa Tropical Storm Basyang suno sa pinakaulihi nga report sang Office of Civil Defense (OCD).
Suno sa Office of Civil Defense, siyam sa mga fatalities ang na-record sa Northern Mindanao (Region X) sa diin apat ang napatay sa landslide sa Cagayan de Oro City, apat man sa Lanao del Norte, samtang isa naman ang gina-validate subong.
Narekord man ang tatlo ka patay bangud sa pagkalumos sa Caraga region, duha sa Surigao del Sur kag isa sa Agusan del Norte.
Suno sa Philippine Atmospheric, Geophysical and Astronomical Services Administration (PAGASA), lima ka beses nga nag-landfall ang bagyo Basyang.
Sa pinakaulihi nga situational report sang National Disaster Risk Reduction and Management Council (NDRRMC), 30 ka mga barangay sa rehiyon sang Caraga ang ginbaha nga nag-apekto sa 64,360 ka pamilya ukon katumbas sang 232,550 ka mga indibidwal sa kabug-usan nga 517 ka mga barangay.
Sa sini nga numero, 16,528 ka mga pamilya ukon katumbas 53,983 ka mga tawo ang nagatinir subong sa 480 ka mga evacuation centers, samtang 4,489 ka mga pamilya ukon katumbas sa16,807 ka mga indibidwal ang ginabuligan sang gobyerno sa guwa sang mga evacuation facilities.
Ginreport man ang kahalitan sa imprastraktura, lakip ang tatlo ka dalan kag duha ka taytay sa Caraga nga lunsay indi maagyan.
Dugang pa, ang OCD nagsiling nga 9,532 ka pamilya ukon katumbas sang 31,981 ka mga indibidwal ang ginpaidalom sa preemptive evacuation sa nagkalainlain nga mga rehiyon. Nagalakip ini sang 1,343 ka pamilya (6,270 ka tawo) sa Negros Island Region, 784 ka pamilya (2,498 ka tawo) sa Central Visayas (Rehiyon 7), kag 6,878 ka pamilya (23,093 ka tawo) sa Caraga.
Samtang, suno sa Department of Social Welfare and Development (DSWD) nakapanghatag sila sang masobra P27 million nga balor sang humanitarian assistance sa mga pamilya nga apektado sang bagyo sa bug-os nga pungsod.
