Nagkalipay ang defence team ni Vice President Sara Duterte sa desisyon sang Korte Suprema nga nagdeklarar nga unconstitutional ang articles of impeachment batuk sa iya.
Suno sa opisyal nga pahayag sang iya defense team, ang desisyon sang Korte Suprema nagapabaskog sang ila pagpati nga ang ika-apat nga reklamo sa impeachment nagalapas sa isa ka tuig nga ban nga gintalana sang Article XI, Section 3(5) sang 1987 Constitution.
Ginapanindugan nila, ang unanimous nga desisyon indi lamang kadalag-an para sa Bise Presidente, kundi isa man ka pagpabaskog sang rule of law kag paandam batuk sa sala nga paggamit sang proseso sang impeachment.
Ginpasalig naman sang grupo nga handa sila magsabat sa anuman nga alegasyon sa nagakaigo nga tion kag sa nagakaigo nga forum.
Antes sini, sang Disyembre 2024, apat ka reklamo sa impeachment ang ginpasaka batuk kay VP Duterte. Ang mga alegasyon nagalakip sang graft kag corruption, pagluib sa pagsalig sang publiko, kag ang kontrobersyal nga pag-ako sa isa ka plano sa pagpatay kay Presidente Marcos, First Lady Liza Araneta, kag House Speaker Martin Romualdez.
Ang ikaapat nga reklamo ginpasaka sang Pebrero 5, 2025, kag gin-endorso sang 215 ka mga katapo sang Kamara, gani ginpasa ini sa Senado para sa pagbista.
Apang sang Hunyo 2025, ang Senado nagdesisyon nga ibalik ang mga artikulo sang impeachment sa Kamara, sa baylo nga magpadayon sa pagbista.
Sa katapusan, ang Korte Suprema nagpaguwa sang desisyon nga nagasiling nga ang ikaapat nga reklamo indi suno sa konstitusyon bangud sang paglapas sa isa ka tuig nga pagsulundan.
