Ginatun-an sang Department of Agriculture (DA) ang liwat nga pagpatuman sang suggested retail price (SRP) sa baboy, pila ka bulan matapos ini nga ginkakas. Katuyuan sang amo nga tikang nga mapabilin ang masarangan nga presyo para sa mga kunsumidor samtang ginasiguro nga patas ang income sang mga retailer kag producer.

Suno kay Agriculture Secretary Francisco Tiu Laurel Jr., posible sa gihapon nga ipatuman ang manufacturer’s suggested retail price (MSRP), ilabi na sa imported nga baboy. Ginpakigbahin sini nga yara sa P220 kada kilo ang landed cost sang imported frozen liempo, apang naglab-ot ini sa P315 sa mga merkado — halos P65 ang dugang.

Pahayag pa nya, kinahanglan nga yara lang sa P260 kada kilo ang presyo. Sa subong, ang mga imported nga baboy nga may manubo nga taripa ang nagabalor sang P250 kada kilo, samtang ang may mas mataas nga buwis ang naglab-ot sa P268–P279 kada kilo.

Madumduman nga ginkakas sang DA ang SRP sang Mayo bangud sa kakulang sang suplay tuga sang African swine fever (ASF). Mabudlay suno sa iya ang mga retailer nga tumanon ang price ceiling bangud mataas ang demand kag manubo ang suplay.

Nahibaluan nga antes pa man ini ginkakas, ang anay SRP sang DA ang yara sa P380/kilo para sa liempo, P350 para sa pigue kag kasim, kag P300 para sa sabit-ulo ukon fresh carcass.