Nagpagwa sang Immigration Lookout Bulletin Order (ILBO) ang Department of Justice (DOJ) batok kay Senador Ronald “Bato” Dela Rosa, suno kay Acting Justice Secretary Fredderick Vida.
Ini ang may kaangtanan sa nagaluntad nga arrest warrant gikan sa International Criminal Court (ICC).
Suno kay Vida, ginmanduan man niya ang mga otoridad sa border control nga punggan si Dela Rosa sa tion nga magtinguha ini nga maghalin sa pungsod, kag gintawag niya ini nga “mockery of justice.”
Ang ICC warrant may kaangtanan sa gina-alegar nga “crimes against humanity” sa idalum sang anti-drug operations humalin sang Hulyo 2016 tubtob Abril 2018, sa diin ginabulubanta nga 32 ka tawo ang napatay, kag si Dela Rosa ang ginkilala bilang isa ka “indirect co-perpetrator.”
Matandaan nga ginpaidalom ini sa protective custody sang Senado matapos gintuyo sang National Bureau of Investigation nga iserbe ang warrant.
Apang, sang ulihi, ginreport nga naghalin siya sa Senado sang Huwebes sang aga upod kay Senador Robin Padilla, kag tubtob subong wala pa mahibaluan kon diin siya.
Gin-athag man sang DOJ nga wala pa sang pormal nga manhunt operation, apang nagpagwa sang hugot nga paandam nga dakpon si Dela Rosa kon magtuyo ini nga maghalin sa Pilipinas.
