DOH-Capiz may yara na sang preventive measures para sa balatian nga monkeypox

ROXAS CITY – Preparado na ang mga preventive measures sang Department of Health (DOH)-Capiz agud indi makasulod sa probinsya ang makalalaton nga balatian nga monkeypox.

Ini ang matapos nga nakapagkit sang labing-una nga kaso sang monkeypox ang probinsya sang Iloilo.

Sa interview sang Bombo Radyo kay Mr. Joefrey Espiritu, Public Information Officer sang DOH-Capiz, may yara na sila gindihon nga stratehiya kun sa diin hugot nga ginabantayan ang mga point of entries sang mga pumuluyo agud ma-identify insigida ang nagamanifest sang sintomas sang monkeypox ilabi na kun nagikan ini sa lugar nga kumpirmado nga may yara sang positibo nga kaso kag pagpahamtang sang capable healthworkers nga maalam pag-abot sa nasambit nga balatian.

Padayon naman ang ginahiwat nga awareness dissimenation sa mga kabanwahan para sa nagakadapat ubrahon kun ikaw ang naka-ekperensya sang mga sintomas.

Yari ang sintomas sang monkeypox virus:
– rashes (vesicular rash)
– lagnat
– pagpalanakit sang ulo, likog
– pagpangluya sang lawas
– pagtubo sang kulatid

Suno kay Espiritu, mahimo nga malatnan ang isa ka persona sang virus pinaagi sa direct kag indirect transmission.

Likawan ang paghawid sa pilas ukon body fluid sang infected nga persona, maghakos kag makighilawas, posible man ini matransfer sa mga droplet, pag-ubo kag paghatsing.

Sa karon, wala pa sang suspected cases ang probinysa sang Capiz.

Panugyan ni Espiritu sa mga pumuluyo, nga indi pagkalipatan ang health protocols kag maghugas sang kamot kag kun maka-ekperensya sang mga nasambit nga sintomas gilayon nga magdulong sa ospital agud matapna ang posibilidad nga paglapta sang monkeypox.