ROXAS CITY – Nakarekord ang Department of Health (DOH)-Capiz sang tatlo ka kaso sang mga nabiktima sang palupok.
Ini ang ginpahayag ni Mr. Joeffry Espiritu, Development Management Office IV sang DOH sang mainterview sang Bombo Radyo.
Suno kay Espiritu nga tatlo ang mga nabiktima sang palupok kun sa diin narekord gikan sa mga banwa sang Pres. Roxas, Jamindan kag siyudad sang Roxas.
Ginpahayag sini nga ang tatlo ka mga ang ginalakipan sang duha ka mga kalalakinhan kag isa ka babaye.
Nag-angkon sang pilas sa tiyan ang isa ka babaye nga nagapang-edaron sang 8-katuig matapos nga nalukpan sang boga sa banwa sang Jamindan.
Magluwas diri, nag-angkon man sang pilas sa kamot ang duha ka mga kalalakinhan nga nagapang-edaron sang 20-anyos kag 45-anyos kun sa diin nalukpan sang 5 star kag kwitis sa Pres. Roxas kag siyudad.
Nahibaluan nga nagsugod ang monitoring sang talatapan sadtong Disyembre 21 tubtob sa Enero 5 sa masunod nga tuig.
Bangud diri, nagpanugyan man ang DOH nga likawan ang paggamit sang palupok kag mag-angkon sang alternatibo nga noise tools kapareho sang mga musical instruments kag mga kaldero kadungan sang pagsug-alaw sang Bag-ong Tuig 2021.
Nagalaom naman si Espiritu nga kuntani indi na madugangan pa ang numero sang mga firecracker related injuries sa probinsya.
