Nagdepensa si Philhealth Board of Directors chairperson kag Department of Health (DOH) Secretary Ted Herbosa sa mga nagahambal nga wala sang pondo ang health state insurer sa 2025.
Suno sa tiglikom, may ara sang pondo ang Philhealth para sa masunod nga tuig kun sa diin daku ang gin-aprubahan nga budget sang Board sang Philhealth nga yara sa P284 billion.
Paathag pa sang tiglikom nga ang subsidiya gikan sa gobyerno ang nadula. Matandaan nga sa ginpatigayon nga bicameral conference committee sa 2025 General Appropriations Bill, wala sang ginpain nga subsidiya para sa Philhealth sa masunod nga tuig bangud may ara pa ini nga P600 billion reserve funds.
Magluwas pa diri, ginpahayag man ni Sec. Herbosa nga subong nga 2024 yara sa 63% ang utilization rate sang Philhealth sa kwarta nga ginpain sang gobyerno para sa mga benepisyo rason nga may P150 billion surplus budget pa ang Philhealth para masakop ang subsidiya para sa indirect members sini.
Gani indi suno diri magpati sa mga ginabasa online nga wala sang pondo ang Philhealth bangud indi ini matuod.
Kaangut sini, ginpahayag ni Sec. Herbosa nga mas daku ang P150 billion surplus budget kun ikumparar sa P74 billion nga subsidiya nga ginahinyo sang Philhealth para sa ila indirect contributors.
Suno pa kay Herbosa, sarang nga magastusan ang tanan nga mga benepisyo sang mga miyembro kag wala sang madula nga benepisyo. Ang mga nagapahadlok lang suno diri kag naga-agitate ang nagasiling nga madula ang benepisyo sang PhilHealth.
