Nabiktima sang ‘love scam’ ang isa ka doktora nga ginhimo mismo sang iya man lang assistant gamit ang isa ka dummy Facebook account kag nagpakuno-kuno nga isa ka lalaki agud makuha ang iya pagsalig kag pagpalangga.
Suno sa National Bureau of Investigation (NBI), naglab-ot sa halos tunga sa milyon ka pesos ang napadala sang biktima sa suspek matapos ini liwat-liwat nga nagarason nga may pinansyal nga problema kag nagakinahanglan sang bulig.
Suno kay Supervising agent nga si Rosalie Laguardia, hepe sang NBI Human Trafficking Division, ang kaso nagapakita nga ang mga modus nga sadto anay ginaangot sa mga POGO kag scam hubs ang ginahimo naman sang mga indibidwal.
Suno sa NBI, gin-take advantage sang suspek ang ginabatyag sang biktima, nga sadto naga-eksperyensya sang depresyon.
Natukiban ang pagpang-into sang ginpakita sang doktora sa isa ka abyan ang picture sang lalaki nga yara sa dummy account.
Nakilala ini sang abyan kag sang gin-contact ang matuod nga tawo nga yara sa picture, napamatud-an nga peke ang Facebook account kag wala sang kahilabtanan ang lalaki sa pagpang-into.
Sa imbestigasyon sang NBI, na-trace ang dummy account nga mismo assistant sang biktima.
Nagpatigayon ang NBI sang entrapment operasyon kadungan sang pagpatuman sang Warrant to Search, Seize and Examine Computer Data.
Wala ginpanginwala sang suspek ang iya ginhimo apang depensa niya, ginbuligan lang niya ang doktora nga madula ang depression sini.
