ROXAS CITY – Severely affected ukon tuman nga naapektuhan sang bagyong Odette nga mga pamilya kag low income ang kwalipikado nga makabaton sang ayuda nagikan sa DILG-DSWD.
Ini ang gin-athag ni Therese Fely A. Legaste, Information Officer – Disaster Response Management Division DSWD Field Office 6 sang ma-interview sang Bombo Radyo Roxas.
Ginpahayag sini nga ang ayuda nga mabaton sang pamilya nga naapektuhan sang bagyo ang may maximum nga P5,000 kag P1,000 kun isa lang ka indibidwal.
Ginklaro man sini nga kun ang pamilya nag-evacuate man ukon wala apang yara sa kategorya sang low income makonsiderar man ini sa gihapon nga resipyente.
Dugang pa sini nga makabaton man ang mga government employees sang nasambit nga ayuda kun sila ang naapektuhan sang bagyo kag na validate sang ila LGU bilang apektado.
Ginpahayag man sini nga ang mga listahan nga ginpadala sang Local Government Unit sa DSWD ang validated na kag ini man ang igapasa sang nasambit nga ahensya sa national government agud nga mahatagan sang pondo.
Nagpanugyan man ini sa mga nagareklamo nga wala na dala sa listahan nga magpadulong sa ila tagsa ka mga LGU kag magpalista agud mapangayuan sang pondo.
