Plano sang Department of Social Welfare and Development (DSWD) kag National Council on Disability Affairs (NCDA) nga sugdan na ang pagpanagtag sang unified I.D. sistema sa Oktubre 2025.
Suno kay DSWD Assistant Secretary for Information and Communications Technology kag Chief Information Officer, Johannes Paulus Acuña, una ini nga i-roll out sa mga pinili nga local government units.
Subong nga bulan suno sa iya, yara na sa idalom sang ‘internal pilot testing stage’ ang ahensya bilang preparasyon sa aktwal nga roll out sang nasambit nga mga ID.
Sa idalum sang nasambit nga stage, ginalantaw kun paano mangin epektibo ang paggamit sang bag-o nga ID system sang mga PWDs.
Ginhimo ang bag-o nga ID system agud masabat ang ginaalegar paglapta sang peke nga PWD IDs nga ginareklamo sang nagligad nga mga binulan.Sa masunod nga mga binulan suno sa natungdan, magapadayon ang testing stage tubtub nga magasugod ang distribution sa bulan sang Oktubre.
Samtang gina-roll out ang testing, ang DWSD nagatrabaho man upod sa Department of Information and Communications Technology (DICT) agud mapabakod ang mga security features sang bag-o nga mga ID.
Lakip sa mga features nga nalakip amo ang mas maayo nga verification system para sa mga PWD ID holders paagi sa database sang Philippine Identification System.
May yara man ini sang quick-response ukon QR code agud mas madasig nga mahibaluan nga lehitimo ang ID.
Sa mga PWD applicants, dapat una nga ipakita ang ila man sini nga national ID.
