Naglab-ot sa kapin 6,000 ka mga reklamo ang nabaton sang Department of Social Welfare and Development (DSWD) Region-6 angut sa distribusyon sang Social Amelioration Program (SAP) sa bug-os nga Westen Visayas.
Ini ang ginkompirmar ni Ms. May Rago Castillo – Regional Information Officer sang Department of Social Welfare and Development Region 6.
Ginpahayag ni Rago nga 4,984 ka mga reklamo ang nasolbar na sang ahensya, 279 ang yara pa sa validation, 80 ang gin-refer sa iban nga ahensya kag 52 ang gin-refer sa grievance committee nga nagakahilanglan sang imbestigasyon.
Gindugang pa ni Castillo nga kadamuan sa mga nabaton nga reklamo sang ahensya ang gikan sa hotline kag chat nga amo ang mga households nga wala makabaton sang nasambit nga ayuda.
Gin-athag man ni Castillo nga may mga reklamo sila nga nabaton nga wala pa masolbar bangud gintugyan sang DSWD sa iban nga ahensya sang gobyerno.
Suno kay Rago nga ang iban nga mga reklamo ang may kahilabtanan sa pamulitika sang mga barangay officials kag gintugyan sang ahensya sa Department of the Interior and Local Government (DILG).
Magluwas diri, ginpahayag man sini nga may mga wala pa naresolbar nga mga reklamo nga gintugyan sa grievance committee bangud nagapadayon pa ang ila nga imbestigasyon.
Samtang ginpangabay ni Castillo sa publiko nga magdangop sa DSWD Region 6 para sa ila nga reklamo angut sa distribusyon sang nasambit nga ayuda.
