Boluntaryo nga nagsungka sa mga kapulisan ang duha ka mga lalaki nga nagapangatubang sa kaso nga robbery matapos maisyuhan sang warrant of arrest sa Roxas Component City Police Station sang Abril 14, 2026.
Ang mga akusado amo sanday alyas ‘Nash’ kag alyas ‘Den’ lunsay 20-anyos kag residente sang Brgy. I, Roxas City.
Sa impormasyon nga nakuha sang Bombo Radyo nagikan sa Roxas Component Police Station, ginpahayag nga boluntaryo ini nga nagpadulong sa istasyon takna las 4:50 sang hapon.
Ang warrant of arrest batuk sa duha ang may kaangtanan sa kaso nga robbery sa idalom sang Article 299 sang Revised Penal Code, nga gin-amyendahan sang Republic Act No. 10951.
Ginpagwa sang Abril 8, 2026 ni Hon. Joy Rubi Infante-Guilot, Presiding Judge sang Regional Trial Court Branch 18 Roxas City.
Ginrekomenda naman sang P72,000 nga balor sang kwarta kada isa sa ila para sa temporaryo nga kahilwayan.
Sa saubong, yara sa kustodiya sang Roxas City Custodial Facility ang duha ka mga akusado samtang ginahulat ang ila nga turnover sa korte nga nagpagwa sang warrant.
