ROXAS CITY – Duha ka mga kabanwahanan sa segundo distrito sa probinsiya sang Capiz ang ginlubog sa tubig baha kasunod sang pagbubu sang mamunog nga ulan nga gintunaan sang pagtaas sang lebel sang mga kasubaan nga sakup sang Panay River.
Ini ang ginkompimar sang talatapan sang Provincial Disaster Risk Reduction and Management Office (PDRRMO).
Sa interview sang Bombo Radyo Roxas kay Provincial Disaster Risk Reduction and Management Office Head Mrs. Judy Grace Pelaez, ginpahayag sini nga may pila ka mga kabanwahan ang apektado sang baha ukon flashfloods.
Kalakip na diri ang pila ka mga kabanwahanan sa segundo distrito.
Suno kay Pelaez nga nagsugod ang baha sa banwa sang Dumarao bangud sa wala untat nga pagbubu ulan .
Gani, tatlo ka mga kabarangayan sa nasambit nga banwa ang padayon nga lubog sa tubig baha apang nagapabilin man sa gihapon nga pasable ang mga dalanon sa mga motorista.
Samtang ginkompirmar man ni Pelaez nga magluwas sa banwa sang Dumarao, pila man ka mga kabarangayan sa banwa sang Dumalag ang ginlubog sa tubig baha.
Magluwas diri, may natabo man nga pagkatiphag sang duta sa Suhot Cold Spring sa Barangay Dolores sang nasambit nga banwa nga natigayon naman nga ma-clear sang mga otoridad.
Ginapaalerto naman sa karon sang talatapan ang mga residente sa mga lugar nga malapit sa suba bangud sa posible nga pagsaka sang lebel sang tubig sa tion nga indi mag-untat ang pag-ulan.
Sandig sa ginpaguha nga datos sang talatapan, kalakip sa mga ginabantayan nga mga kabanwahanan amo ang Cuartero,Maayon, Mambusao, Pontevedra kag Pres, Roxas, Capiz.
