Boluntaryo nga nagsurender ang duha ka anay miyembro sang rebelde nga grupo sa headquarters sang 1st Capiz Provincial Mobile Force Company ukon CPMFC sa Capiz.
Ang mga nagsurender amo sanday alyas “Moymoy,” 29-anyos, kag “Bebe,” 78-anyos, nga lunsay residente sang Barangay Culasi, Roxas City.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office ukon CPPO, iya ginpahayag nga boluntaryo nga ginpili sang duha nga mag-withdraw sa rebelde nga grupo kag magbalik sa sabak sang gobyerno.
Suno kay Garnica, padayon ang kapulisan sa pagbukas sang oportunidad para sa mga miyembro sang rebelde nga grupo nga luyag magbalik sa komunidad kag magkooperar sa gobyerno.
Sa subong, yara na sa paghinakop sang 1st Capiz PMFC ang duha para sa nagakaigo nga disposisyon kag pagproseso sang mga benepisyo ukon bulig nga mahimo nila mabaton.
