Nagpatigayon sang drone attack ang militar sang Iran batok sa duha ka base militar sang US sa Kuwait bilang sabat sa pag-atake sang Amerika sa teritoryo sang Iran.
Sa isa ka pahayag nga ginpagwa sang militar sang Iran paagi sa state broadcaster sang pungsod, ginpahayag sini nga naghimo sila sang daku nga pag-atake gamit ang ginatawag nga “kamikaze drones” batok sa storage sang bala sang militar sang Estados Unidos sa Camp Udairi kag sa Patriot radar systems kag air surveillance radar sa Ali Al Salem Air Base sa Kuwait.
Suno sa Iran, ginhimo ang nasambit nga operasyon bilang balos sa pag-atake sang Estados Unidos sa teritoryo sini.
Sa subong, padayon nga nagalala ang tensyon sa Middle East kag wala pa sang pahayag ang US sa nasambit nga pagpang-atake.
